حلبة Drift

السلام عليكم ورحمة الله وبركاته .

ليش ما يسوون في البحرين حلبة الى الدرفت ؟ موجود عندنا في البحرين حلبة للفورميلا 1 وموجود حلبة الى الدراق Drag والحمد لله . والحين الشباب كلهم يلغمون سياراتهم الى الدراق بدل ما كانوا يلفمونها الى الشوارع وهذا الشي كان يسبب حوادث مميته الله يبعدنا ان شاء الله , اكثر من 300 سيارة كل مرة يدخلون الى الدراق يجربون سياراتهم “Test” ويهدون مع بعض في الحلبة بدل ما يهدون عند دوار 13 في مدينة حمد و في شارع اخبار الخليج في مدينة عيسى وشارع مدينة حمد العام,

حلبة الدرفت ماراح تكلف مبلغ كبير , لأانه مجرد ارض مسطوحة بالاسفلت و مدرج الى الجمهور وانارة . الحلبة موجوده في الامارات والمشاركين فيها ما شاء الله سيارات حلوة كثيرة , بدل ما يسوون درفت في الشوارع .و حلبة الامارا بسيطة وتعجبني في تصميمها

حاليا في البحرين اكثر المناطق شهرة الى الدرفت هو “الفنس” في سترة والعدلية وساحل ابوصبح وفي مدينة حمد . وهذي الاماكن تلقى جمهور كبير . لأن هذي الرياضة حلوة جدا وتحس بالمتعة في الدرفت :)

الدرفت هو فن تلويت السيارة يمين ويسار بأختصار شديد هو “التخميس” كل واحد ياخذ راحته في الحلبة ويخمس مدة معينة وبعدها يدخل الي بعده , ويقيم الجمهور اداء كل سائق بالحركات اللي يسويها مثل كم فرة عمل و كم المسافة اللي مشاها وهو معترض .

WAMA – Blue

السلام عليكم .

طلعو لنا من فتره بفرقة يديدة يسمونها WAMA تقلد فرقة Blue بكل شي

 

 

 

طبعا الكل يقول انهم افضل من Blue وهذا غير صحيح مطلقا لأن اغاني بلو الى الحين الناس تسمعها وتستمتع بها والكل يقول ياريت ما تفرقوا , ومو الفرقة المصرية اللي تكسح BLUE BAND ,

كتبت الموضوع لأانه قهرني شويتين واغاني بلو يقارنونها بفرقة توها طالعة لها يومين

 

BayaT

%تصميم% مولد الامام العسكري (ع)

السلام عليكم ورحمة الله وبركاته

تتقدم مدونة الدرازي والمدون فيها “صادق الدرازي” باجمل التهاني والتبريكات بمناسبة مولد الامام”الحسن العسكري” عليه السلام

اعاده الله علينا باليمن والبركات

ووردبرس 2.5

السلام علكيم …

تم بعون الله الترقية الى “ووردبريس 2.5″ WordPress2.5

والحمد لله دون اي مشاكل , كما قمت بتغير الوسوم من اضافة “plugins” الى الميزة التي تأتي مع هذه النسخة .

ما شاء الله السكربت جميل وخصوصا لوحة التحكم ارتحتها لها والوانها حلوة ومريحة وتوزيعها الجديد احسه انه افضل , وفيها مميزات يديدة مميزة

 

بالتوفيق ان شاء الله

من اصول بلوشية !

يا هلا

 اليوم كنت ابحث عن طريقة عمل طبخة للوالدة , توجهت الى الحبيب الاول قوقل وكتبت كلمة البحث وكل العادة تظهر لي نتائج البحث وبما اني بحريني واعمل على نطاق .com.bh فأظهر لي قوقل النتائج من مواقع بحرينية ! طبعا كل هذي المقدمة مالها داعي :D

المهم ! قرأت الطريقة ونزلت الى الردود واذا بي اتفاجئ بتوقيع احد اعضاء المنتدى كالتالي !! .

 للحظة . اصبح هذا البلوشي شهيد الوطن ! طيب هو الحين يقول من اصول بلوشية ! مايتمعن شوي في الصورة اللي في الاطار ؟ هذا بحريني؟ يشوف واحد في فريقهم او في منطقته يشبه هذا الشكل ؟

“قدم حياته فداء للوطن ” ! ما شاء الله , من متى البلوش يغلون الوطن اكثر من سكان الوطن نفسه ؟ يعني الحين هذا يخاف ويغار على اهل البحرين اكثر من اهل البحرين نفسهم ! يعني يا صاحب التوقيع هل هذا يخاف على اهلك اكثر منك ؟ ثانيا يعني الحين مافي مواطن بحريني يقدر يحل مكان هذا البلوشي ؟ خلاص وصلت نسبة البطالة في البلد الى 00% ؟ اللي يكون بلوشي شرطي ؟ انا اشك في صاحب هذا التوقيع انه مجنس لأن ما اعتقد ان اي بحريني اصلي سواء كان شيعي او سني يرضى ان يقول عن اهله “يهود”

انا مالي بالسياسة بتاتا ولكن مو الى هذي الدرجة من الكذب على الناس ! صحيح “البحرين وبس” ايضا ان لا يكون بلوشي اغلى من ولد البلد ,

على العموم كلها مسألة وقت !